Қалаға есірткі заттарын тұрақты түрде тасымалдаумен айналысқан күдікті ұсталды. 34 жастағы ер адам есірткіні еліміздің оңтүстік өңірлерінен жеткізіп отырған. Ақтөбе станциясындағы желілік полиция бөлімінің қызметкерлері оның тұрғылықты жерін тексеру барысында 115 полиэтилен орамадағы өсімдік тектес заттарды тауып, тәркіледі.
Жыл басынан бері Ақтөбе станциясына қарасты темір жол аумағында психотропты заттарды заңсыз дайындап, тасымалдауға қатысты 34 қылмыстық іс тіркелді. Жалпы салмағы 5 келіден асатын есірткі айналымнан шығарылды. Желілік полиция қызметкерлері бұл көрсеткіш өткен жылдың осы кезеңімен салыстырғанда едәуір көп екенін айтты.