Пәтердегі бұраннан ағып тұрған ауыз суды сескенбей-ақ іше беруге болады. "Ақбұлақ" АҚ жанындағы сынақ зертханасы мамандарының кеңесі бұл. Зертхана қала және қала сыртындағы елді мекен халқы тұтынып отырған ауыз су мен су кеніштерінің сапалылығын қадағалап отырған бірден бір мекеме. Бұл сынақ зертханасы "Ақбұлақ" АҚ-мен тығыз байланыста. "Ақбұлақ" таратып отырған ауыз судың сапалылығын қадағалайды. Демек, 23 су іркуіш құрылыс пен 130 ұңғыманы бақылауында ұстап отыр. Шыны түтіктерге толы ғимарат ішінде ақ халаттылар құбырлар арқылы қала мен елдімекендерге таратылып жатқан судың ішуге жарамдылығын тексерумен айналысады. Ирина Дядчуктің өзі пәтердегі бұранға келіп тұрған суды кез-келген уақытта іше береді. Өйткені өз бақылауынан өтіп жатқан тіршілік көзінің сапалы екендігін біледі. Ал ақтөбеліктер арасында судан да құрт-құмырсқа, лас қалдықтар тауып алып, оны жарияға жар салып жататындары табылады. Маманның бұған қатысты айтар өз уәжі бар. Өйткені сәйкес шақыртулар бойынша бірнеше рет тексеруге барған. Алайда су сапасына шағымданушылар өз сөздерін дәлелдей алмаған жайттар аз емес дейді маман.