Барша мұсылман қауымы Айт мерекесін тойлауда. Кеше «Нұр Ғасыр» орталық мешітінде айт намазы оқылды. Облыс әкімі Архимед Мұхамбетов мешітке жиналған жамағатты Ораза айт мерекесімен құттықтады. Айт намазына келушілер көп болды. Жексенбі күні мұсылман қауымы "Нұр Ғасыр" мешітіне қарай ағылды. Амандасып, қауқылдасқан жұрт айтыңмен деп құттықтасып жатты. Айт намазына жиналған жамағатпен облыс әкімі Архимед Мұхамбетов жүздесті. Рамазан - құлшылық пен сабыр, береке мен бірлік, мейірім мен қайырымдылық айы болса, үш күн бойы тойланатын Ораза айт мейрамы - адамдардың көңілін көтеріп, жанын жадырататын ұлық мереке. Айт күндері барша мұсылман таза киімдерін киіп, өзара құттықтау сөздер айтқаны жөн. Бір-бірімен кездескен адамдар жылы шырайлы амандасып, өзара жағдайларын сұрағандары абзал. Бұл күндері күнкөрісі төмен жандарға, мұқтаж адамдар мен жоқ-жітіктерге жәрдемдескен жөн. Қазір облыс бойынша 64 мешіт жұмыс жасауда. Қаладағы ескі және Мұғалжар аудандарындағы мешітке күрделі жөндеу жұмыстары жүргізілуде.