Қанжығада 3 алтын, 3 қола медаль. Ақтөбелік жекпе-жек шеберлері Қостанай қаласында ұлттық спорт түрі жекпе-жектен ерлер мен әйелдер арасындағы Қазақстан Республикасының чемпионатында үздік үштіктен көрінді. Ақпанның 25-і мен 28-і аралығында өткен ел біріншілігінде 8 жерлесіміз бақ сынаса, олардың алтауы жеңіс тұғырына көтерілді.
Қазақстан Республикасы тәуелсіздігінің 30 жылдығына орайластырылған шараға бабы келіскен спортшылар елдің әр түкпірінен қатысты. Мықтылар бақ сынасқан жарыста 3 алтын мен 3 қоланы қанжығасына байлап, сенімді ақтаған ақтөбелік спортшыларға жаттықтырушысы дән риза. Жекпе-жектен әйелдер арасында өткен бәсекеде облыстық құрама мүшесі Карина Питецкая жүлделі үшінші орынды иеленді. Ол 57 келі салмақ дәрежесінде сынға түскен. Айта кетейік, жалпы командалық есепте Қостанай облысының спортшылары көш бастады. Ал екінші орынды Алматы облысының құрамасы иеленді.