Кешеден бастап қаламыздағы №30238 әскери бөлімде аумақтық қорғаныс ротасының оқу-жаттығу жиыны өтіп жатыр. Шараға әскери міндетін атқарып келген, запастағы ақтөбелік 110 жауынгер шақырылған. Кеше запастағы жауынгерлер өрт қауіпсіздігі, қару-жарақпен танысу кезіндегі сақтық шараларын сақтау секілді жалпы ережелермен таныс болды. Ал бүгін олар АК-74 Калашников автоматының жұмыс істеу тәсілі мен жалпы құрылысын еске түсірді. Ертең әскерилер Ақжар полигонында АК-74 Калашников автоматынан оқ атудан шеберліктерін шыңдайды. Сондай-ақ запастағы жауынгерлер қаруларды тазарту және майлау әдістерін де қайта еске түсірмек. Ал ақырғы кезеңде әскерилерді саптық байқау күтіп тұр. Одан әрі үздіктер мақтау қағаздарымен марапатталып, жиын соңы салтанатты сапта жүрумен аяқталмақ.