Өнерсүйер ақтөбеліктер үшін рухани азық жинаудың сәті туды. Бүгін Ақтөбеде Қазақстан драма театрларының 21-ші республикалық фестивалі басталды. Елдің түкпір-түкпірінен жиналған театр ұжымдары бес күн бойы облыстық драма театр сахнасында спектакльдер қояды. Фестивальдің шымылдығы атақты жерлесіміз, драматург, мерейтой иесі Тахауи Ахтановтың "Ант" қойылымымен ашылды. Тахауи Ахтановтың 90-жылдық мерейтойына арналған Қазақстан драма театрларының дәстүрлі 21-ші фестивалі осы жылдың өнер саласындағы айтулы мерекесі екені сөзсіз. Өнер тойына Әуезов атындағы академиялық драма театры, Қалибек Қуанышбаев атындағы мемлекеттік қазақ музыкалық драма театры, Максим Горький атындағы орыс драма театры, Бикен Римова атындағы Талдықорған драма театры секілді елдің тоғыз жетекші театр ұжымы келген. Фестивальдің ашылу салтанатына Тахауи Ахтановтың ұлы Дулат пен қызы Әсия қатысты. Әсия Ахтанова әкесінің атындағы театр сахнасына тұңғыш рет көтерілді бүгін. Фестиваль аясында көрермендер назарына 10 түрлі қойылым ұсынылады. Алматыдағы Әуезов атындағы академиялық драма театр Серік Асылбекұлының «Империядағы кеш», Қалибек Қуанышбаев атындағы мемлекеттік қазақ музыкалық драма театры Шерхан Мұртазаның «Бір кем дүние», Максим Горький атындағы орыс драма театры Оралхан Бөкейдің «Атау-кере», Астана қалалық Жастар театры Бердібек Соқпақбаевтың «Көзіме бір көрінсең бала ғашық» сияқты спектакльдерімен ақтөбелік көрермендердің бір аптасын театр мерекесіне айналдырады. Театрлардың өнеріне Қазақстанның халық артисі, театр режиссері Есмұқан Обаев бастаған қазылар алқасы төрелік етеді. Фестиваль бағдарламасында Ақмола, Солтүстік Қазақстан облыстық театрлары, Бикен Римова атындағы Талдықорған драма театрының спектакльдері де бар. Ал, өзіміздің Т.Ахтанов атындағы облыстық драма театрдың орыс труппасы Ольга Марктің «Время - это птица» спектаклін әзірлеп жатыр. Соңғы күн, сенбіде Сәкен Сейфуллин атындағы Қарағанды облыстық қазақ драма театры ұжымы "Қыз Жібек" спектаклін қойып, сол күні кешке фестиваль жеңімпаздары жария етіледі.