Бүгін жастар ресурстық орталығында "Ақтөбе облыстық Семей ядролық сынақ полигоны ардагерлерінің жесірлері" қоғамдық бірлестігінің конференциясы өтті. Шараға 1976-1978 жылдары Семейдегі ядролық сынақ полигонында әскери борышын өтеп, түрлі аурудан көз жұмған азаматтардың жұбайлары қатысты. Олар сынақтың зардабын әлі күнге дейін тартып келе жатқанын айтады. Радиациялық ауру бірнеше ұрпаққа тарайды. Құрылғанына 7 ай болған ұйымда 39 ардагердің жесірі бар. Сынақтың зардабын шеккен отбасыларға ешқандай әлеуметтік көмек берілмей отыр. Полигонның әсерінен ауырып қайтыс болған азаматтардың жұбайлары ауру балаларына жәрдемақы мен жеңілдіктердің қарастырылуын талап етіп отыр. Бірлестіктің мүшесі Клара Даулыбаеваның жолдасы жүрек талмасынан қайтыс болған. Одан кейін 13 жастағы ұлы ішек ауруынан көз жұмған. Баласына жасалған 4 ота да көмектеспеген. Дәрігерлер аурудың радиация әсерінен болғанын анықтаған. Қалған 4 баласына да осы диагноз қойылып, ота жасалған. Қазір қызының 6 жасар баласы ауыр жағдайда. Осыған дейін екі рет операция жасалған. Қазіргі таңда қаражаттың жоқтығынан кезекті рет ота жасау мүмкін болмай отыр. Ырысжан Жайлаубаева да Клара Даулыбаеваның тағдырласы. Қоғамдық бірлестік мүшелері айына 4-5 мәрте кездесіп тұрады. Өздерінің ұйымшылдықтарының арқасында радиацияның салдарынан қайтыс болған ардагерлерге арнап ескерткіш қойдыртқан. Онымен қоса, полигонның жабылуының 30 жылдығына орай "Ерекше тәуекелді сарбаздар" кітабын басып шығарған. Мұндағы мақсат полигонда болған ардагерлерді ұмытпау және ұмыттырмау.