Бүгін шаһарда ерлікке толы мәліметтер топтастырылған "Октябрь 1941" кітабының таныстырылымы өтті. Ресейлік қос жазушы Галина Грин мен Владимир Черновтың бірлескен екінші туындысы Ақтөбе жерінде құрылған әйгілі 312-ші атқыштар дивизиясының тарихына арналған. Кітап Мәскеу жерінде жазылған. Аймаққа арнайы жеткізілген туындымен Кеңес Одағының батыры Әлия Молдағұлованың облыстық мемориалды музейінде ауған соғысының ардегерлері, қоғамдық бірлестік өкілдері, "Әлия" іздестіру жасағының мүшелері, Ұлы Отан соғысы ардагерлерінің туғандары, №2 орта мектебінің оқушылары танысты. Орыс тілінде жарық көрген кітап әзірше 2 мың данамен тараған. Қос автор Мәскеудегі орталық кітапханаларда сақталған әскери мәліметтерді топтастырған.
Музейде аталмыш кітаппен танысқан жиналғандар оң пікірлерін білдірді. Туындыда 312-ші атқыштар дивизиясының тарихы тың баяндалған. Мәскеу маңындағы фашистік басқыншылармен болған екі апталық шайқас дәл суреттелген. Бұл жарты айда жеке құрамның 90 пайызы қырылып қалған болатын. Бірақ дивизияның сарбаздары өздеріне қойылған талапты орындап, Мәскеуге қарай жылжыған жауды тоқтата алды. Ақтөбе жерінде құрылған 312-ші атқыштар дивизиясы құрамына 11 мыңға жуық сарбаз алынған. Оның 60 пайызын ақтөбелік жас құраған. Маңғыстау, Қызылорда өңірінен де жас жігіттер алынған. Екінші дүниежүзілік соғыс аяқталған соң ғана туған жерге дивизия құрамынан 1300 адам оралған. Қазір 312-ші атқыштар дивизиясына арналған музей №2 орта мектебінде жасақталған.