Бүгін таңда 11-ші мөлтек ауданындағы сулы-жасыл гүлзар түгелдей суға кетті. Жапсарлас орналасқан "Су паркі" ғимараты мен шаһардың бас даңғылына жайылған су көлік қозғалысына қиындық туғызды. «Aqtobe su-energy group» АҚ-нан нақтыланғандай, аталған ауданда магистралды су құбыры жарылған. Басты даңғылды бірнеше су сорғылау техникасы құрғатты. Бірнеше ауданды ауыз сусыз қалдырған апат таңда орын алған. Үш жылдан кейін қайталанып тұрған апат су жүйесіндегі ақаудан шыққан. Магистралды құбыр су қысымына шыдас бермей, жарылған. Асфальт бетіне шыққан ылғал гүлзар мен "Су паркі", тұрмыстық техника сататын дүкендер желісі ғимараты маңына бірден жайылып кеткен.
Әп-сәтте көлік кептелісі орын алған ауданда су сорғылау техникалары кешке дейін жұмыс істеді. Бірнеше техника жұмылдырылып, басты даңғыл мен сулы-жасыл гүлзарды судан құрғатты. Естеріңізде болса, осыдан үш жыл бұрын дәл осы аумақ жаз мезгілінде суға кеткен болатын. Апатқа магистралды құбырдың жарылуы себеп болды. Апат орын алған жерді қалыпқа келтіру жұмыстарын жүргізген мекеме құбырлардың әбден ескіріп тұрғандығын айтқан болатын. Бірақ, бұл жолы шаһардағы су жүйесіне жауапты монополист мекемеден қандай да бір нақты жауап алу мүмкін болмады. Оқиға орнында жұмыс жасап жүргендер су соратын техникаларының жеткілікті екендігін айтқанмен, апаттың қайталану себебін түсіндіруден бас тартты.