Қаламызда 400 шақырымнан астам су құбыры бар. Алайда олардың басым көпшілігі әбден тозығы жетіп, ескірген. Жерасты құбырларының 60 пайыздан астамы 70-ші жылдары салынған. Пайдалану уақытының аяқталғанына біраз жылдар өтсе де сол құбырлардың көбісі осы уақытқа дейін бірде бір рет жөндеу көрмеген. Осындай көненің көзіне айналған Құрмыш ауданындағы ауыз су желілерінің бір бөлігін "Ақбұлақ" АҚ жөндеуге кірісті. "Ақбұлақ" АҚ-ның Жүргенов көшесінің бойындағы 9 метрлік су құбырын алмастыруға кіріскеніне бүгін 3-ші күн. Жұмысшылар аталған аумақта екі ауысымда тер төгуде. Осы аймаққа қолда бар барлық техника жұмылдырылған. Алайда жер астындағы инженерлік-коммуникациялық желілер жұмысты уақытында аяқтауға барынша кедергі келтіруде.