Өңірдегі кафе, барларда түнгі қылмыс азаймай тұр

Аймақтағы клубтар, барлар мен кафелерде, мейрамханаларда түнде жасалатын қылмыс азаймай отыр. Тақырып бүгін облыстық кәсіпкерлер палатысында талқыланды. Шараға палата өкілдері, прокурорлар, тәртіп сақшылары мен кәсіпкерлер қатысты. Мәселе бұған дейін де талқыланып, түрлі шаралар қолданылған. Алайда, нәтижесі жоқ. Қылмыс көбінесе түнгі сағат екіден кейін жасалады дейді мамандар. Демалыс орындарында бейнебақылау камераларының санын арттырып, дабыл түймелері де орнатылуы қажет. Бұрын жасалған рейд кезінде кәсіпкерлердің лицензияланған күзет қызметтерімен келісімшарт жасамағандығы анықталған. Ал, кәсіпкерлер полиция қызметкерлері көңіл көтеру орындарын қатаң бақылауға алса екен дейді. Сондай-ақ, заңды күшейту керектігін айтады. Осыған орай, облыстық кәсіпкерлік палатасының мамандары кәсіпкерлер мен полиция қызметкерлеріне, қалалық әкімдік, қалалық прокуратура, Қоғамдық кеңес өкілдерімен бірігіп, ойын-сауық орындарының қауіпсіздік рейтингін жасауды ұсынды. Ойын-сауық орындарының жұмыс уақытын түнгі 2-ге дейін шектеу ұсынылды. Мұндай рейтинг мекеме иесінің жауапкершілігін арттырып, қоғамдық қауіпсіздікті жақсартуға ықпал етеді, дейді ұйымдастырушылар. Тұрғындарға рейтинг арқылы қауіпсіз ойын-сауық орынын таңдауға мүмкіндік береді.
Количество показов: 109
Дата создания: 02.03.2025 09:00:07