"Өнер керуені" аудандарға жол тартты. Биыл тұңғыш рет облысымызда ауқымды мәдени шара бастау алды. Тұсаукесер рәсімі бүгін Т.Ахтанов атындағы облыстық драма театрында өтті. Мәдениет ұйымдары өнер көрсетті. Оны әрі қарай аудан өнерпаздары жалғастыратын болады. Қыркүйек айының соңғы жексенбісі былтырдан бері өнер және мәдениет саласы қызметкерлерінің күні ретінде мерекеленеді. Кәсіби мерекелерін облыстық мәдениет басқармасы кең ауқымда атап өтуді жоспарлап отыр. Ең басты шара - "Өнер керуені" эстафетасы. Бүгін драма театр сахнасында "Екі езу", "Аққу" би ансамблі, "Алақай" қуыршақ театры, кітапханалар , облыстық тарихи өлкетану мұражайы секілді ұжымдар өнерлерін паш етті. Эстафетаны бірінші болып қабылдап алатын - Шалқар аудандық мәдениет бөлімі. Таңдаудың Шалқарға түсу себебі- ертең ауданда ақын, әнші Сары Батақұлының 150 жылдық мерейтойына арналған республикалық "Дала дастаны" атты дәстүрлі әншілер байқауы өтеді. Биыл мерекені тойлауда тағы бір ерекшелік бар. Облыстың мәдениетін дамытуға үлес қосқан, еңбегі сіңген азаматтардың есімі енді "Құрмет кітабына" енгізіледі. Облыстық мәдениет басқармасының басшысы Нәзира Табылдинованың айтуынша, кітапқа әр ауданнан бір адамның есімі жазылады. Эстафета аяқталған соң, "Құрмет кітабы" облыстық тарихи-өлкетану мұражайына табысталады. "Өнер керуенін" өткізудің басты мақсаты- өнер ұжымдары мен мәдениет саласы қызметкерлерінің арасында шығармашылық байланыс орнату, әрі олардың мәртебесін көтеру.