Ереуілге шыққан мұнайшылардың барлық талап-арыздары қатанағаттандырылды. Компания қызметкерлерінің айлық жалақысы 20 пайызға өсіп, асханадағы тамақ мәзіріне де өзгеріс енгізілді. Бүгін "ҚМК Мұнай" АҚ- ның басшылығы арнайы баспасөз маслихатын өткізіп, осындай мәлімдеме жасады. Естеріңізге сала кетсек , "ҚМК Мұнай" АҚ жұмысшылары жаңа жылдан бері екі рет бас көтерді. Ашық түрде ереуілге шыққан жұмысшылар, жұмысты тоқтатып ең алдымен жұмыс берушіден айлық жалақыларын көтеруді талап еткен болатын. Бүгін компания басшылығы жұмысшылардың ереуілі заңсыз, бірақ еңбек тәртібін бұзған мұнайшыларға шара қолданылған жоқ деп отыр.
Өндіріс орнындағы мұнайшылар ереуіл кезінде ең алдымен жалақыны көтеруді талап етті. Содан кейін кәсіподақ ұйымы төрағасының жұмысына көңілдері толмайтынын жеткізген болатын. Жұмысшылардың құқын қорғауға қабілетсіз кәсіподақ тарап, енді мұнайшылар алдағы уақытта жаңа кәсіподақ төрағасын сайлауды жоспарлап отыр. Ереуілге шыққан мұнайшылардың талаптары бойынша қазір компания жұмысшылардың жалақысын 20 пайызға өсірген. Орташа жалақы бұрын 187 мың теңге болса, қазір 280 мың теңгеге жеткен. Жұмысшылардың сұрауы бойынша мұнайшыларға жазда жаңа асхана ғимараты салынады. Алыстан қатынайтын жұмысшылар үшін қызметтік автобус бөлінген.