Екі мәрте Кеңес Одағының батыры Талғат Бигелдинов атындағы әуе қорғаныс күштері әскери институтын тәмамдаған 71 түлекке бүгін салтанатты түрде диплом мен лейтенант шені тапсырылды. Оқу бітіріп жатқандардың үшеуі Тәжікстан азаматы. Салтанатты шара облыс әкімдігінің алдындағы алаңда өтті. Бұл әскери оқу орнын тәмамдаған жастардың соңғы рет бір сапта жүруі. Төрт жылдан астам уақыт бірге білім алып, нағыз офицерге айналған жастар үшін қобалжуға толы күн. Енді жолдары сан тарапқа айрылады. Дегенмен, мектеп жасынан-ақ әскери саланың маманы атануды армандаған Мағжан Сапарбек секілді ұландар енді ел үшін еңбек ететін уақыты жеткеніне қуанышты. Талғат Бигелдинов атындағы әуе қорғанысы күштерінің әскери институтын бұл жолы 11 мамандық бойынша 71 түлек бітіріп шықты. Олар алғашқы курстарда-ақ білімін тәжірибемен де ұштастырып, барлық тиісті талаптан өткен. Құрылымы күрделі соңғы үлгідегі ұшақтар мен тікұшақтарды басқаруды меңгерген. Оқудың толық курсынан өткен авиация саласының мамандары заманауи үлгідегі ұшу техникаларын басқарудың қыр-сырын және әуедегі ұрыс тактикасын да жетілдірген. Білімді де білікті жас офицерлердің оқу бітіру шарасына қарулы күштердің ардагерлері, түлектердің ата-аналары мен қала тұрғындары да куә болды.
Әскери оқу орнын бітіру салтанаты алғашқы офицерлік вальспен аяқталды. Сондай-ақ, жас ұшқыштар сәттілік серігіміз болсын деп аспанға монеталар лақтырды. Түлектер енді еліміздің қарулы күштерінен өзге ұлттық қауіпсіздік комитетінде және Ішкі істер министрлігінің арнайы бөлімшелерінде де қызмет ете алады.