Жанқожа батыр көшесіндегі №9 үйге жарылғыш зат қойылды. Бүгін полицияға белгісіз біреу қоңырау шалып, осындай хабар берген. Құтқарушылар дереу айтылған үйге жетіп, тұрғындарды сыртқа шығарды. Саперлар үйді тінтуге кірісті. Сағат кешкі төрт жарымдар шамасы. Үйлеріңде бомба бар деген хабар алған Жанқожа батыр көшесіндегі №9 үйдің тұрғындары пәтерлерін тастап, жаппай сыртқа атылды. Кейбіреулері құжаттарын ала шықса, бірқатары асығыста киініп үлгермеген. Полиция қызметкерлері үйді қоршап алып, аулаға ешкімді кіргізбеді. Саперлар тұрғын үйді тінтіп шыққанша, әліптің артын бағып тұрған халық суықта бүрсеңдеді. Шұғыл қызметтер шамамен бір сағат бойы көпқабатты үйдің төбесінен бастап, жертөлесіне дейін шолып шықты. Жарылғыш зат табылған жоқ. Полиция қызметкерлері қоңырау шалынған нөмірдің иесін іздестіріп жатыр. Ай мен күннің аманында дүрліккен Жанқожа батыр көшесінің тұрғындары сағат алтыларда өз пәтерлеріне кірді.