Ақтөбе іргесіндегі "Жаңақоныс-4" ауылына әлі газ берілмеді. Жергілікті әкімдіктің құрғақ уәдесінен шаршаған ауыл тұрғындары бүгін облыс әкімдігінің алдына жиналды. Облыс әкімі Ералы Тоғжановпен жүздесіп, проблемаларын жеткізбек болған. Онымен аймақ басшысы бүгін Темір және Байғанин аудандарына жұмыс сапарымен кеткен. Жоспар бойынша ауылға газ қыркүйекте беріліп болуы керек екен. Қазір қазан айы. Бірақ істің тындырылатын сыңайы байқалмайды.Ақтөбенің іргесіндегі "Жаңақоныс-4" ауылының тұрғындары газ желісіне қосыла алмай қиналып жүр. Былтырдан бері өткізіліп қойған құбырлардың бойына газ жіберу мәселесін әкімдік пен мердігер мекеме өкілдері шеше алмай келеді. Ал өткен қыстан әрең шыққан ауылдықтардан қазір тағы да маза кете бастаған. Себебі, көгілдір отынның берілу мерзімі қайта-қайта кейінге шегеріліп келеді. Жылуды күтуден шаршаған жұрт қысты жалдамалы пәтерлерде өткізуге қалта көтермейді дейді. Әділхан Әнешов ауылға былтыр көшіп келген. Содан бері көгілдір отынды күтумен келеді. Ал газдың қашан берілетіні әзір белгісіз. Сондықтан «биыл да жылусыз қаламыз ба?» деген күдігі басым. Күз түскелі үйдің іші де суытып, балалары жиі ауыратын болған. Жер үйін қараусыз қалдыруға ұры-қарыдан қауіптенеді. "Жаңақоныс-4" ауылы қаладан алты шақырым қашықта бой көтеруде. Шамамен 300-ге жуық жер үй бар. Былтыр ауылда 70-ке жуық отбасы қыстап шыққан. Газ болмағандықтан пешке от жаққан тұрғындар алдағы қыста жағдайдың қайталғанын қаламайды. Ауылда өзге де проблемалар жетерлік. Көшелер болғанымен тақтайдай жол жоқ. Көшелер жарықтандырылмаған. Мектеп, амбулатория секілді әлеуметтік нысандар салынбаған. Балалар сабақты қалаға қатынап оқиды.
Ауылды газбен қамтуға жауаптылар тұрғындардан тағы бір апта күте тұруларын сұрап отыр. Яғни "Жаңақоныс-4" ауылына газ 15-ші қазан күні берілуі тиіс. Ал қаламен екі ортаға жол құрылысына бюджеттен қаражат қашан қарастырылатыны әзірге белгісіз.