"Қой!" дейтін қожа табылмағаннан кейін қаладағы қоқыс шығарушы мекемелер әбден еркінсіп кетті. Камаз-камаз қалдықты қалаған жеріне апарып ақтара салатын деңгейге жеткен. Рауан-2 тұрғын алабынан берілген жер телімдеріне иелері үйлерінің іргетасын құя алмай отыр. Үлкен аумақ қоқыс полигонына айналған. Жағдайдың осыншама ушығуына "Алматы" ауданы әкімдігі жол бергені ме? Рауан-2 тұрғын алабынан берілген жерлеріне азаматтар үй тұрғыза алмай отыр. Себебі, былтыр қазық қағылған жерлер қазір қоқыс полигонына айналған. Қоқыс жайылған алаңның көлеміне қарап, мұнда тұрмыстық қалдықтардың жылдар бойы төгіліп келгенін байқауға болады. Жер телімдерінің иелері әлі де белгісіз компанияларға тиесілі жүк көліктерінің мұнда қоқыс шығарып жүргенін айтады. Оның дәлелі ретінде видео да түсіріп алған.
Қоқыс алаңының мұншалықты үлкейіп кетуі көрші тұрған Нұр-Ақтөбе ауданының да тұрғындарын алаңдатып отыр. Себебі, қоқыстан шыққан жағымсыз иіс көрші ауданға лезде жетеді. Ал, егер оны өртейтін болса, аумақты түтін алып кетеді деп қауіптенеді. Рауан-2 тұрғын алабында бей-берекет қоқыс алаңының пайда болғанынан жергілікті билік хабардар. Мұндай сорақылыққа жол берген шенеуніктер енді аумақты тазартуға қыруар қаржы жұмсамақ. Алматы ауданы әкімінің орынбасары Бақұзақ Дариннің айтуынша, аудан аумағында анықталған 23 заңсыз қоқыс алаңдарын жою үшін жергілікті бюджеттен 94 млн 900 мың теңге бөлініп отыр. Конкурс жақын арада аяқталып, жеңімпаз мердігер анықталғанмен ұйым мен әкімдік арасында жасалатын келісімшарт мерзімі қанша уақытқа белгіленетіні беймәлім. Сондай-ақ, осынша қоқысты толығымен тазарту қашанға дейін созылатыны да белгісіз. Сондықтан, Рауан-2 тұрғын алабындағы жер телімдеріне иелері биыл жазда үй тұрғыза аламайтыны анық.