Бақандай жеті айдан бері жалақыларын ала алмай жүрген жұмысшылардың бойын ыза кернеген. Агенттіктің өкілдерінен құрғақ сөз емес, нақты қай күні адал ақыларын алатындарын сұрады.
"Семсер" күзет агенттігінен жалақыларын ала алмай жүргендердің саны 70-ке жуықтайды. Көпшілігі екі-үш ай жасап, ақша төленбегесін шығып кеткен. Барлығы отбасын асырап отырған азаматтар. Жұмысшылардың шағымдары бойынша келген қала әкімінің орынбасары Ұшқын Мыңбаев мекеме басшылығына мәселені шешуге тапсырма берді. Әкімшілік қойған талап бойынша барлық жұмысшыларға 2 айдың ішінде жалақылары өтелуі тиіс. Жұмысшыларына еңбекақыларын уақытылы төлемей келген "Семсер" күзет агенттігі еңбек нарығында біраз жылдан бері жұмыс жасап жүрген компания. Төрт жерде күзету нысандары бар агенттікте 100- ден аса жұмысшы қызмет етеді. Аталған мекеме үстінен бір ай бұрын облыстық еңбек инспекциясы жөніндегі басқармасына бірнеше шағым түскен. Тексеру жүріп жатыр.