Жыл соңына дейін қала маңындағы Қурайлы ауылындағы 156 үйге көгілдір отын, 600 тұрғынға электр жарығы беріледі. Бүгін облыс басшысы Оңдасын Оразалин бұл жұмыстарға жауапты мердігер компаниялардың жұмысын тексерді. Сондай-ақ, аймақ басшысы Оңдасын Оразалин шағын бизнестегі кәсіпкерлердің жағдайымен танысты. Себебі кәсіпкерлік саласы дамымай елдің әл-ауқаты да жақсармайды. Өңір басшысы кәсібін нәсіп еткен азаматтардың жұмыс жоспарын тыңдады. Қала маңындағы Қурайлы ауылындағы 156 үй көгілдір отынға қол жеткізеді. Бүгінде газ құбырын тарту жұмыстарына 50 миллион теңге жаратылды. Бұдан өзге 600 үйге жарық беріледі. 7000 метрлік кабельді орнатуға 116 миллион теңге жұмсалған. "Интер Электро Комплект" серіктестігі құрылыс жұмыстарын келесі айдың ортасында аяқтайды. Сондай-ақ Қурайлы жастарына арнап қала әкімдігі жаңа футбол алаңын салды. Бұған дейін ауыл балалары футболды ашық алаңқайларда ойнайтын. Бүгінде "KURAILY" футбол командасына 5-16 жас аралығында 50 бала тартылған. Қыста "KURAILY" футбол командасы ауылға қарасты мәдениет үйінің спорт залында жаттығады.
Бүгінде Сәтпаев көшесіндегі №23- орта мектебінде үш ауысымды білім беру мәселесі шешілді. Орын тапшылығын жою үшін мектепке қосымша ғимарат салынды. Қазір мұнда 2500-ге жуық бала білім алады. Айта кету керек, қалада тағы осындай "Нұр Ақтөбе" және "Батыс-2" ауданындарындағы №60, 64 орта мектептер үш ауысымда білім береді. Бұл мектептердің мәселесі келесі жылы шешіледі. Аймақ басшысы Оңдасын Оразалин шағын кәсіпкерлікті дамытуды жолға қою керектігін айтты. Оңдасын Оразалин "М.Стиль" баспа серіктестігінің жұмысымен танысты. Полиграфия ісінің қыр-сырын меңгерген Меңдіғали Жұмағұлов кәсібін дөңгелетіп отыр. Қазір "М.Стиль" серіктестігі түрлі бұйымдардың жапсырмаларын, шұжық, сүт тағамдарының, басқа да азық-түлік өнімдерінің орамаларын, дәрі-дәрмектің қораптарын, күнтізбелер, билеттер, қорапшалар, нөмірленген бланкілер т.б. бұйымдар шығарады. Бизнестегі ақтөбелік бикештің бірі Жанат Бекбауова. Оның сөзінше, тамақ өнеркәсібі ешқашан тасада қалмайды. Жанат қалада 5 дүкен желісін ашқан. Бүгінде манты, келілеп сатылатын тұшпара мен тартылған етке сұраныс көп. Аспаздық орталықтың иесі 50 адамды жұмыспен қамтып отыр. Облыс басшысы бизнесмендердің алдағы уақыттағы жұмыс жоспарымен танысты. Сондай-ақ, өңірде орын алған мәселелерді шешуде жауаптыларға тапсырма жүктеді.