Коронавирус қаупі әлемді кезіп кетті. Қазір елдегі барлық санитарлық-карантиндік бекеттер күшейтілген тәртіптегі жұмысқа көшкен. Әуежай, теміржол вокзалдарында дене қызуы жоғары жолаушыларды анықтайтын құралдар жұмыс жасап тұр. Ақтөбе халықаралық әуежайындағы тепловизордың жұмысы бүгін сынақтан өтті. Оқу-жаттығуға мүдделі барлық қызметтер жұмылдырылды. Бүгін Ақтөбе халықаралық әуежайындағы қауіпсіздік шаралары пысықталды. Оқу-жаттығу бір мезетте бүтін республика бойынша өтті. Оған барлық мүдделі қызметтер жұмылдырылды. Алдын ала ойластырылған оқиға желісі бойынша санитарлық-карантиндік тексеру жүргізу барысында елордадан Ақтөбеге ұшып келген жолаушылардың бірінен жоғары дене қызуы байқалады. Әуежайдың фельдшері оны дереу оқшаулап, тиісті мекемелерге хабар береді. Инфекционистер жеткенше анализдер алына бастайды. Коронавирус жұқтырған болуы мүмкін жолаушыға жедел жәрдем шақыртылып, ол облыстық жұқпалы аурулар ауруханасына әкетіледі. Ал әуежайда залалсыздандыру жұмыстары жүргізіледі. Сондай-ақ, ол адаммен байланыста болғандар тексеріледі. Облыстың санитар-эпидемиологтары мұндай жағдаймен ұшырассақ, төтеп беруге әзірміз деп отыр. Аурудың нақты емі жоқ. Дәрігерлер тек белгілерімен ғана күресе алады.
Ертең Қытайда шығыс күнтізбесі бойынша жаңа жыл мерекесі басталады. Осы уақытта жан-жақтағы Қытай азаматтары мерекені отбасыларымен бірге қарсы алу үшін елдеріне асығады. Қытай мемлекеті пневмонияның таралуына орай биыл жаңа жыл тойлаудан бас тартқан. Әйтсе де қауіпке қарамастан кетіп жатқандары баршылық. Ақтөбе әуежайы бүгінде тек елдің ішіндегі рейстерге қызмет көрсетуде. Халықаралық рейстер, соның ішінде Ақтөбенің Қытаймен әуе қатынасы жоқ. Қытайдан Қазақстанға қатынайтындар Нұр- Сұлтан, Алматы әуежайларына келіп қонады. Алайда коронавирустың инкубациялық мерзімі екіден 10 тәулікке дейін екенін ескерсек, Алматы, Нұр-Сұлтан әуежайларында науқас алдын ала анықталмауы мүмкін. Сондықтан біздің әуежайлар бәріне дайын болуы шарт.