Өткен тәулікте қалада өрімдей 4 жігіт суға батып кетті. Қайғылы оқиғаның бірі Өрлеу ауылында суға шомылуға тиым салынған орында болған. Бір отбасы 16, 18 жастағы екі баласынан айрылды. Ал қаладағы коммуналдық жағажайға қарсы бетте 19 және 20 жастағы ақтөбеліктер суға кетті. Екі жігіттің денесін сүңгуірлер 5 метр тереңнен көтерген.
Айта кету керек, облыста суға түсуге рұқсат етілген 72 орын белгіленген. Соның 18-і қалада. Аквапарк пен коммуналдық жағажайдан бөлек су етегінде 16 жеке демалыс орны бар. Ақтөбе облысының төтенше жағдайлар департаменті су айдындарындағы қауіпсіздік ережелерін сақтап, рұқсат етілген орындарда ғана суға түсуге кеңес береді.