Өңірлік тұрақтандыру қорының қоймасын жергілікті көкөніске толтыру биыл тек "Пригородный Ауылшаруашылық" ЖШС жүктелген. Қазір алқаптардан жиналған картоп, пияз, сәбіз, қырыққабат қоймаға жеткізілуде. Тұрақтандыру қоры қоймасына түскен өнімдер көкөніс қымбаттайтын желтоқсан-сәуір аралығында саудаға шығарылады. Тұрақтандыру қорының міндеті қалада көкөніс тапшылығына жол бермеу және азық-түлік бағасын реттеу. Қала базарларына елдің өзге облыстарынан немесе шет мемлекеттерден көкөніс қымбат бағада келер болса, тұрақтандыру қорындағы өнімдер қолжетімді бағамен сатылып, базар нарқына өзгеріс енеді.
Қала іргесіндегі "Пригородный Ауылшаруашылық" ЖШС қалалық тұрақтандыру қорының негізгі серіктесі. Ауа-райының қолайсыздығына қарамастан картоп, сәбіз биыл бітік шыққан. Қоймаға күз басталғалы 1200 тонна картоп, 136 тонна сәбіз жиналған. Тұрақтандыру қоры "Пригородный" серіктестігінен картоптың келісін 62 теңгеге, сәбізді 64 теңгеге сатып алды. Кейін базар және дүкендерде бұл өнімдер 10-15 пайыздық өсімақымен сатылады. Мұнда өнімдерді сұрыптаумен 15-ке жуық адам айналысады. Бүгінгі таңда қорда ұнның 1060 тоннасы, күріштің 40 тоннасы бар. Ал елдің өзге аймақтарынан 20 тонна қарақұмық, 300 тонна пияз, 150 тонна қырыққабат жеткізілмек. Себебі биылғы қуаңшылыққа байланысты аталған көкөністердің түсімі аз.