Ірі тұрмыстық қалдықтарды полигонға тұрғындар өздері шығаруы тиіс. "Астана" ауданы әкімдігі мамандарының айтуынша, ақтөбеліктер қоқыс жәшіктерін құрылыс материалдарымен толтырып жатыр. Сондай-ақ, ескірген жиһаздарын, істен шыққан тұрмыстық техникаларын да осында әкеліп тастауды әдетке айналдырған. Тұрмыстық қалдықты полигонға шығару біздің міндет, ал қоқыстың қатты түрлерін тасуға тұрғындардың өздері жауапты, дейді әкімшілік қызметкерлері. Ережеге сай, қоқыс полигондары пластик, полиэтилен, құрылыс материалдары мен жиһаздарды қабылдамайды. Ол үшін арнайы белгіленген орын бар. Тұрғын өз қаражатына көлік жалдап, арнайы орынға жеткізуі тиіс.
Қазір құрылыс маусымы басталды. Әр аулада құрылыс материалдары мен ескірген жиһаз тау болып үюлі тұр. Оған арнаулы техника жалдауға әркімнің қалтасы көтермейді. Әкімшілік қызметкерлерінің айтуынша, бір рейстің өзі 10 мың теңгенің көлемінде. Тұрғындар болса, қоқыс жәшіктері ғана тазаланып, маңайы біразға дейін шашылып жататынын айтып, наразы. Коммуналдық мекеме өкілдері қоқыс жәшіктерінің бәрі кестеге сай уақытында тазаланып жатқанын айтады. Дегенмен, тез толатынын да мойындайды. Ал оған пәтер иелерінің үйдегі адам санын азайтып көрсетуі себеп. Ал контейнерлер болса адам санына сәйкес қойылады. Егер күл-қоқыс дер кезінде шығарылмаса, "109" нөміріне шағым түсіруге болады, дейді жауапты мамандар.