Ақтөбелік тұрғын Елена Медетованың бүгін таңда жуынатын бөлмесінің төбесі опырылып ортасына түскен. Абырой болғанда бүтін бір отбасы мүшелері бұл сәтте шырт ұйқыда жатқан. Гүрс етіп шыққан қатты дыбыстан ол шошып оянады. Дереу төтенше жағдай қызметіне хабарласады. Жеңіс даңғылындағы №33 үйдің 52-ші пәтерінің иесі қақаған қыста төбесі құлаған үйде отыру мүмкін емес деп қапаланып отыр. Бірақ жағдаймен танысқан құзырлы орган өкілдері әзір хаттама толтырудан артық әрекетке көшпеген сыңайлы. Қыстың күні пәтерінің төбесі опырылған Елена Медетова бұл үйде ұзақ жылдан бері тұрады. Жарты ғасырға жуық тарихы бар үш қабатты үйге биыл қыркүйек айында жөндеу жүргізілген. Мердігер мекеме кіреберісті түзеп, қасбетін бояп, шатыр ауыстырған.
Көршісінің сөзін Татьяна Хафизова да жалғады. Байырғы тұрғын үш ай бұрын үйге жасалған жөндеу жұмысына көңілі толмайтынын айтады. Бүкіл аудан тұрғындары реновация бағдарламасымен тұрып жатқан үйлерін жөндетуге келіскендеріне өкініп қалған. Тұрғын екі-үш қайта хабарласқаннан кейін ғана пәтерге құзырлы орган өкілдері бас сұғып кеткен. Хаттама толтырғандар жуынатын бөлмеге кіруге болмайтындығын ескертіпті. Қақаған қыста мұндай жағдайға тап болған тұрғын енді қандай әрекетке бару қажеттігін білмей отыр. Бала-шағасымен туысқандарының үйіне баруға да қысылады. Бар үміті жөндеу жүргізген мекеме жұмысшыларында. Олар көп ұзамай келіп, төбені жамап береді дегенге сенуден басқа амалы жоқ.