Сочидегі қысқы Олимпиада ойындарына санаулы уақыт қалды. Дайындық қызу жүріп жатыр. Маңызды додаға жолдама алуға талпынған спортшылар соңғы дайындықтарын пысықтап жатыр. Соңғы уақытта футболда тасымыз өрге домалағанмен, спорттың олимпиадалық түрлерінен облыстың асығы алшысынан түсіп тұрған жоқ. Жазғы олимпиада ойындарында спортшыларымыз сынға түспей-ақ, саптан шығып қалғаны бар. Бүгін журналистермен кездескен облыстың бас спортшысы Асылбек Құлмағамбетов ақжолтай хабар жеткізді. Сочиде өтетін ақ Олимпиаға Ақтөбеден үміткерлердің бар екендігін айтты.Ақтөбе дегенде көптің ойына бірінші футбол оралады. Бұған жергілікті клубтың Еуропа Лигасына іріктеу ойындарындағы жеңісі ғана емес, ел чемпионатының бес дүркін жеңімпазы болғандығы да себеп. "Ақтөбенің" әдемі ойынын тек жергілікті тұрғындар емес, өзге өңірлерден келген жанкүйерлер де тамашалауға құмар. Бірақ, Қобыланды батыр атындағы орталық стадион оған тарлық етеді. Тығырықтан шығудың бір жолы- жаңа стадион салу.