«СНПС-Ақтөбемұнайгаз» АҚ ұжымы "Наурыз" мерекесіне орай «Наурыз-жыл басы» атты байқау өткізді. Байқау компанияның әкімшілік департаментінің тіл саясаты бөлімінің бастауымен жүзеге асты. Сайыстың мақсаты қазақтың дәстүрлері мен тарихын дәріптеп, насихаттау.Биыл «СНПС-Ақтөбемұнайгаз» АҚ құрылғанына 25 жыл толды. Атаулы датамен тұспа-тұс келген "Наурыз" мерекесін ұжым қатар атап өтуде. «СНПС-Ақтөбемұнайгаз» АҚ ұжымы ел тарихы мен мәдени құндылықтарын дәріптейтін іс-шараларға белсенді қатысады. Жыл сайын бөлімшелер мен филиалдардың қызметкерлері қазақтың дәстүрлерін, тіл мәдениетін зерделеу және білімдерін тексеру мақсатында түрлі байқаулар мен тренингтер ұйымдастырады. Байқауға «СНПС-Ақтөбемұнайгаз» АҚ барлық филиалынан 120-ға жуық қызметкер қатысты. Әрқайсысы 8 адамнан құралған 11 топ байқау барысында түрлі тапсырмалар орындап, өнерлерін ортаға салды.
Байқау 5 турдан тұрды. Олар «Асық ату», "Халық әндері", "Айтыс-сөз өнері", қазақ халқының салт-дәстүрі, әдет-ғұрпы бойынша "Викторина сұрақтары" және " Наурыз бата" деп аталды. Байқау қатысушыларға рухани азық қана емес, сонымен қатар, керемет көңіл-күй де сыйлады. Жеңімпаз командаға «СНПС-Ақтөбемұнайгаз»АҚ бас директорының атынан қолөнер бұйымдары, байқау кубогі және құрмет грамоталары табыс етілді.