"Шағала" мен "Достық" су спорты кешендері келесі аптада ашылмақ

Қаламызда спорт инфақұрылымы дамып келеді. Облыс әкімі Асхат Шахаров жаңадан салынған және күрделі жөндеуден өткен нысандарға барып, жөндеу жұмыстарының барысын тексерді. Жаңадан салынған 5 кешеннің екеуі бүлдіршіндерді қабылдауға дайын. Қызылжар және Ясный тұрғын алаптарында балаларға арналған екі дене шынықтыру-сауықтыру кешенін ашу жоспарлануда.Қызылжардағы спорт нысаны 500 баланы қабылдауға қауқарлы. Волейбол, баскетбол, үстел теннисі және жекпе-жек бойынша секциялар ашылады. Сондай-ақ жүз орындық трибуна бар. Дене шынықтыру-сауықтыру кешенін «Ерзат» мердігерлік ұйымы салған. Жобаның құны - 557,97 млн теңгені құрайды. Ал, ақпан айында Балауса, Кеңес Нокин және Ақжар тұрғын алаптарында тағы үш спорт нысаны ашу жоспарланып отыр.
Облыс әкімі Асхат Шахаров күрделі жөндеуден өткен «Шағала» және «Достық» бассейндерінде болды. «Шағала» бассейніне күрделі жөндеу жүргізген «ГрадСтройСервис» серіктестігі мен қазір сот талқылаулары жүріп жатыр. Әйтсе де, жағдай нысанның қайта ашылуына кедергі болмады. Комиссияның оң шешімі бар. «Достық» спорт кешені де жөндеуден өткен. 1ші ақпанға дейін мердігер жұмысты аяқтайды деп күтілуде. Сонымен қатар, аймақ басшысы №5 «Олимп» балалар-жасөспірімдер спорт мектебіне барды. Онда жылу алмастырғыш жөнделіп, үздіксіз жаттығу үшін жаңа жабдық сатып алу жоспарланып отыр.

Количество показов: 399
Дата создания: 28.01.2025 07:12:14