Ақтөбедегі сауда орындарына тұрақтандыру қорынан жеткізіліп отырған көкөністер күнделікті тексеріліп жатыр. Бағасы әлдеқайда арзандатылған әрі тұтынушылар "шіріген" деп наразылық танытып жатқан картопты облыстық ауыл шаруашылығы басқармасының мамандары мен мониторингтік топ өкілдері қадағалауда. Бүгін осы топ өкілдері тұрақтандыру қорындағы көкөністердің сақталу жағдайымен тағы бір мәрте танысты. Тұрақтандыру қорынан күнделікті сауда нүктелеріне 2 тонна картоп пен 2 тонна пияз, 1 тонна сәбіз түседі. Ақтөбелік тұтынушылар тарапынан сынға ілініп жатқан картоп сапасына қатысты талап өткен аптадан бастап күшейтілген. Қоймадағы көкөністер күнделікті бірнеше мәрте іріктеледі. Тұрақтандыру қорында қазір 1260 тонна картоп бар. 380 тонна пияз, 120 тонна сәбіз, 40 тонна қырыққабат сақтаулы. Көкөністер алдағы сәуір айына дейін жетіп қалуы тиіс.
Ал тұрақтандыру қорындағы көкөністің сапасына жауапты "Ақтөбе" әлеуметтік-кәсіпкерлік корпорациясының өкілі қордың өнімі сапасыз болуы мүмкін емес деп ақталды. Жауапты мамандар қоймадағы картоптардың балғын екендігіне күмәнданбайды. Өнім «Пригородный» ЖШС-де өсірілген, іші сары, сырты ақ түсті. Дүкенге жеткенше күз, қыс айларында +3 градустық температурада сақталады. Көкөніс келісіне бекітілген әлеуметтік баға 84 теңгені құрайды. Ақтөбеде картоптың келісі 200 теңгеден жоғары. Көкөніс бағасының өсуін тежеп, халықты арзан өніммен қамту үшін тұрақтандыру қорындағы картоп саудаға келер жылдың сәуір айына дейін түсіп отырады. Картоптан бөлек, қорда сақталған сәбіз бен пияз, қырыққабат жеткілікті. Айтпақшы, тұрақтандыру қоры өнімдерінің сапасын бағамдайтын мониторингтік топ қаладағы ірі сауда желілерінің көкөніс сақтайтын қоймаларына бас сұға алмай отырған көрінеді. Жеке сауда нүктелері қоймаларының аумағы аса үлкен еместігін жасырмайды. Бірақ тексеріс жүргізуге үзілді-кесілді қарсы болған.