Жерлесіміз әнші Салтанат Меңдіғалиева «Қазақстан дауысы» жобасының ақтық сындарында өнер таластыруда. Бірнеше іріктеуден сүрінбей өткен Салтанат енді соңғы сайыста жерлестерінен қолдау күтеді. Әнді нақышына келтіре орындап, қалың көрерменді де, қазылар алқасын да тәнті еткен Салтанат Меңдіғалиева «Қазақстан дауысына» «әу демейтін қазақ жоқ» деп, жайдан-жай бара салған жоқ. Ол өнердің қайнаған ортасында жүрген әнші. А.Жұбанов атындағы Ақтөбе музыка колледжінің түлегі. Хор-дирижерлік бөлімнің түлегі колледж қабырғасында жүріп те талай байқаудан жүлдемен оралған. Өнерін Америкада да паш етті. Ш. Қалдаяқов атындағы халықаралық байқауда лауреат атанды. Үнемі талпыныс, ізденіс үстінде жүретін оның бағы да, бабы да келісіп, «Қазақстан дауысы» жобасында бірнеше кезеңді артқа тастады. Енді оны 29-желтоқсанда үлкен сын күтіп тұр. "Түзде баласы атқа шапса, үйде анасы тақымын қысады" дегендей ата-анасы Ақтөбеде қыздарының тілеуін тілеуде. Топты жарып шығатынына үмітті. Тек жерлестеріміз қолдауда кем қалмаса дейді. Ақтөбеміздің мерейін асырып жүрген әнші қызымызға ұялы телефоннан смс жолдау арқылы қолдау көрсетуге болады. Естеріңізге сала кетейік, ақтық сайыс 29-желтоқсанда «Қазақстан» ұлттық арнасында кешкі сағат тоғызға жиырма бес минут қалғанда тікелей эфирде өтеді.