Бүгін орталық базардың ішіндегі сауда павильоны отқа оранды. Қызыл жалыннан екі адам зардап шекті. Облыстық төтенше жағдайлар департаментінің өрт сөндірушілердің тактикалық оқу-жаттығуын өткізу үшін жоспарлаған оқиға желісі осындай. Кезекті жаттығу барысында құтқарушылар мен өрт сөндірушілердің іс-қимылы пысықталды. Жаттығу барысында сауда, ойын-сауық орталығының ішіндегі адамдарды қауіпсіз аумаққа көшіру жұмысының тиянақты тындырылуына баса назар аударылды. Өрт екінші қабаттан шыққан. 101 шаршы метр жерге жайылып үлгерді. Оқу-жаттығуға қатысушылардың жұмысын қиындату үшін оқиға желісіне зардап шегушілер де кірістірілген. Өрт сөндірушілер өрт ошағынан екі адамды далаға алып шығып, дәрігерлердің қолына тапсырды. Оқу-жаттығудың мақсаты - еліміздің өзге аймақтарында жиілеп кеткен базарлардағы өрт оқиғаларын болдырмау. Оқиға орнында өрт сөндіру штабы ұйымдастырылып, жауынгерлік учаскелері құрылған. Өрт жарты сағат ішінде ауыздықталды. Артық шығынның орын алуына жол берілген жоқ. Тактикалық оқу-жаттығуға 31 өрт сөндіруші, апат медицинасы, жедел құтқару жасақтары қатысты. 9 техника жұмылдырылды. Жыл басталғалы облыстағы ірі мекемелерде өрт сөндірушілердің дайындығын пысықтауға бағытталған 14-тен астам тактикалық оқу-жаттығу өтті.