Облыс бойынша ҚР Президентін кезектен тыс сайлауда дауыс берушілердің белсенділігі жағынан Ойыл ауданы көш бастап тұр. Бұл ауданда электораттың 90 пайызы дауыс берген. Ал, саяси науқанға қатысу жағынан ең төмен нәтиже Мұғалжар ауданында. Облыс бойынша сайлау кезінде құқықбұзушылық анықталмады. Республика бойынша сайлауда дауыс берушілердің белсенділігі жағынан Ақтөбе облысы 13 - ші орында тұр. Ойылдықтар ерлеген. Бұл ауданда электораттың 90 пайызы дауыс беруге келді. Қобда және Қарғалы ауданында сайлаушылардың 87 пайызы таңдау жасаған. Ырғыз ауданында 85 %, Әйтеке биде 84 %, Хромтау ауданында да 84 %, Мұғалжар ауданында 65 % халық сайлауға қатысты.
Облыс бойынша 4311 тұрғын сайлауда алғаш рет өз таңдауын жасады. Оларға жеке кәсіпкерлер тарапынан арнайы сыйлықтар табыс етілді. Сонымен қатар, жеке кәсіпкерлердің ұйымдастыруымен азық - түлік жәрмеңкесі де ұйымдастырылған болатын.Біздің облыста Қасым-Жомарт-Тоқаевқа 331 мың 41 адам дауыс берген. Жигули Дайрабаев 18 мың 908 ақтөбеліктің даусына ие болды. Одан кейінгі орында Нұрлан Әуесбаев 9517 дауыспен. Салтанат Тұрсынбекова облыс тұрғындарының 9312 дауысын алды. Қарақат Әбден - 8536, Мейрам Қажыкен 4125 дауысқа ие болды.