Облыстың орта мектептерінде математика пәні тереңдетіліп оқытылуы мүмкін. Математика сабағының сапасын арттыру мақсатында оқушыларды екі топқа бөліп оқыту қарастырылмақ. Облыстық білім басқармасы басшысының орынбасары Нұргүл Бертілеуованың айтуынша, бұл жоба білім және ғылым министрлігінің бекітуімен жүзеге асырылмақ. Пилоттық жобаға қай мектептер ілігетіні әзірге белгісіз. Өңірде 100 мектеп "Назарбаев мектебінің" тәжірибесінде сабақ оқыту жүйесін қолға алмақ. Таңдалған мектептердің материалдық-техникалық базасы түгелдей жаңартылады. Биыл жыл соңына дейін жоспар бойынша 282 орта мектепке жөндеу жүргізіледі. Алдыңғы кезекте кітапхана мен спорт залдары, асхана бөлмесі жаңғыртылады.
Мұғалімдердің биылғы оқу жылында жалақысы 30 бен 50 % арасында көбейтілген. "Оқуға құштар мектеп" жобасы бойынша биыл 100 млн теңгеге мектептерге көркем әдебиеттер таратылады. Оқушылар бос уақытында әлем, қазақ классиктерінің шығармаларымен таныса алады. Облыс бойынша 424 мектеп, 558 бала-бақша, 42 колледж бар. Білім саласында 25 мың педагог еңбек етіп жүр. Былтыр 123 білім мекемесіне тексеру жүргізілген. 324 заңбұзушылық анықталған.
Ойыл ауданының "Саралжын орта мектебі", Әйтеке би ауданы "Басқұдық", "Әйке орта мектебі", Мұғалжар ауданындағы "Жаңатұрмыс" орта мектептері біліктілік талаптарына сәйкес келмеген. Мектептер тіпті арнайы кабинеттермен жабдықталмаған. Ал ұстаздар қайта даярлау курстарына жіберілмеген. Тексеру нәтижесіне сәйкес жіберілген олқылықтар түзетілген.