Қазақстандағы астық қоймаларында шамамен бір жарым аптаға дейін жететін бидай қоры қалған. Ол таусылса, диірмендер тоқтатылуы мүмкін. Бұл туралы Қазақстанның астық өңдеушілер одағы хабарлады. Ал біздің өңірде әзірге ұннан тапшылық байқалмайды. Дегенмен, тұрғындар ұн мен нанның бағасы едәуір өскенін байқаған. Еліміздің астық өндірушілер одағының мәліметіне қарағанда, қазір бидайдың бір тоннасы 160 мың теңгеге дейін қымбаттаған. Бірақ мұндай бағадағы бидайдың өзін табу қиын. Соның салдарынан Қостанай облысында диірмендердің жартысынан астамы, Қарағанды облысында 15 диірмен жұмысын тоқтатқан. Солтүстік Қазақстан, Павлодар облыстары мен Алматыда да диірмендердің басым бөлігі жұмыс істемей тұр.
Ал біздің қаладағы ірі сауда желілерінде ұннан тапшылық байқалмайды. Мұнда 2 келілік жоғары сұрыпты ұн бағысы 489 теңгеден басталады. Ал 10 келілік ұнның бағасы 4200 -ден 6600 теңгеге дейін саудалануда. Диірменшілер ауыл шаруашылығы министрлігінен Қазақстаннан бидай экспортын тоқтатып, қорларды түгендеуді талап етіп отыр. Бұған дейін ішкі нарықтағы бағаны қазақстандық ұн өндірушілер пайдаланған арзанырақ ресейлік бидайдың импорты ұстап тұрған. Енді Ресей астық экспортын толығымен тоқтатқаннан кейін біздегі зауыттар да жұмысын тоқтата бастады. Ал ауыл шаруашылығы бірінші вице-министрі Айдарбек Сапаров Қазақстанда астық тапшы деген ақпаратты жоққа шығарды. Республикада бидай жеткілікті. Сондықтан азаматтарды дүрлікпеуге шақырамын, деді Сапаров орталық коммуникациялар қызметінде өткен баспасөз мәслихатында.
Оның айтуынша, 1 сәуірдегі жағдай бойынша республикада 6,4 млн тонна бидай бар. Вице-министр ішкі қажеттілікті ескерсек, бұл көлем елді қамтамасыз етуге жеткілікті екенін атап өтті. Тіпті, астықтың бір бөлігін экспортқа да шығаруға болады. Сапаровтың айтуынша, мәселе бидай тапшылығында емес, бидай бағасында.Айтуынша, ішкі нарықта тапшылық туғызбау үшін ведомствоаралық комиссия 2022 жылғы 1 сәуірден 15 маусымға дейін ұн мен бидай экспортын квоталау туралы шешім қабылдаған. Бидайға квота көлемі – 1 млн тонна, ал ұнға – 300 мың тонна. Өңірлерде бидайға инвентаризация жүргізіледі.