Екі бірдей қызметкері өрескел әдепсіздік танытқан Қобда аудандық мемлекеттік кірістер бөлімінің басшысы қатаң сөгіс алды. Бердібек Әмірғалиевтің бүгін әдеп жөніндегі кеңестің кезекті көшпелі отырысында беті қызаруына тура келді. Басшының қоластындағы екі бірдей бас маман 23 қыркүйек күні аудандағы караоке-барда ішімдік ішіп, дәмхананың қабырғасына кіші дәрет сындырған. Әрі ішкен-жегендерінің ақшасын төлемегендерімен қоймай өздеріне ескерту жасаған дәмхана қызметкеріне қол көтерген. Жұмыстан босатылған қызметкерлер аудандағы "Вагнер" караоке-бар дәмханасында кешкілік көңіл көтереді. 2200 теңге төлеуден жалтарған олар дәмхана жұмысшыларына ойларына келген қылықтарын көрсеткен. Сыртқа шығып кіші дәрет сындырып, ескерту жасаған әйел адамға қол көтереді. Тіпті дәмхана басшысының аудандық мемлекеттік кірістер бөлімінің басшысына яғни бұрынғы басшысы Бердібек Әмірғалиевке ұнамай жүргенін жеткізіпті.
Тәртіптің кеңес мүшелерінің алдында күмілжіген Бердібек Әмірғалиев қос қызметкері Әмірғалиев пен Бәйменовтің бұл уақытқа дейін теріс қылықтарын байқамағанын айтып ақталды. Мемлекеттік қызметкерлер қарапайым маманнан бас маманға дейін көтерілген. Жұмысқа тиянақты, артық қылықтарын көрсетпеген. Аудандық бөлім басшысы әдепсіздік көрсеткен қызметкерлерін 24-ші қыркүйек күні жұмыстан босатады. Бүкіл облысқа жария болған жағдайдан кейін аудандық бөлімнің басшысы Бердібек Әмірғалиевтің өзі де жұмыстан босатылады. Бүгін тағы қатаң сөгіс алды. Тағы бір ескеретін жайт - ай сайын өтіп тұратын әдеп жөніндегі кеңесте баяндамалар тек қана ресми тілде дайындалады. Көбінесе аудандық қызметкерлердің мәселесі көтерілетін мұндай жиындарда аудиторияға қазақ ұлтының өкілдері жиналады. Ауызекі тілдесу, сұрақ-жауап мемлекеттік тілде өрбігенмен жауапты тұлғалар баяндамаларды мемлекеттік тілде даярлауға құлықсыз.