Қоғамдық көлікте мобильді банк қосымшасы арқылы және қолма-қол есеп айырысатындар үшін жол ақысы 150 теңге. Алайда бұл талапты кей жолаушылар елемей, 80 теңгеден төлеп жүр. Ал кей жүргізушілер оған көз жұмады. Жыл басынан заңды бұзған 15 адам анықталып, әкімшілік жазаға тартылған. Қоғамдық көліктер онлайн төлемақыға көшкелі біраз уақыт өтті. Алайда, жол ақысын төлеуден жалтаратын жолаушылар саны азаймай отыр. "Смарт автобус- Ақтөбе" ЖШС-нің басшысы Қанат Дженгалиев қоғамдық көлік қызметінің сапасын арттыру мақсатында тұрғындарға мобильді банк қосымшасы арқылы немесе қолма- қол есеп айырысу кезінде кондуктардан билет талап ету қажет екенін ескертті.
Қазіргі таңда қалада 200-ге тарта автобус жүріп жатыр. Ал қоғамдық көліктегі тәртіпті тексеру үшін 11 бақылаушы жұмылдырылған. 1 адам 1 сағатта 3 автобусты ғана тексеріп үлгереді. Алайда ол жеткіліксіз. Барлық автобусты ұдайы тексеріп отыру үшін кемінде 20-30 адам керек. Қазіргі таңда кадр жетіспеушілігі мәселесін шешудің жолдары қарастырылуда, дейді Қанат Дженгалиев. Жол ақысын төлеуден жалтарған немесе толық төлемеген жолаушыға 2 айлық есептік көрсеткіш көлемінде айыппұл қарастырылған. Ал жолаушылардан қолма- қол ақы талап ететін кондукторлар мен жүргізушілер 5 айлық есептік көрсеткіш көлемінде айыппұл өтейді. Жыл басынан заңды бұзған 15 адам анықталып, әкімшілік жауапкершілікке тартылған.