Некрасов көшесінде жарықшамдар орнатылып жатыр. Бүгін басталған шаруа екі аптаның ішінде бітуі тиіс. Көше бұрынғыдай түнгі мезгілде толықтай жарықтандырылатын болады.Некрасов көшесінде жолды кеңейту жұмыстары жүргізілгелі жарық жоқ. Қараңғы түссе жаяуларға да, көлік жүргізушілеріне де қиын. Әйтсе де, бұл көшеде шамдар жанатын күн алыс емес. Бүгін "Ақтөбе қалалық жол құрылысы" мердігерлік мекемесінің жұмысшылары көше бойына жарықшамы бар бағаналарды орната бастады. Шамдармен қатар, бұл көшеде суағар жүйесі де ретке келтіріліп жатыр. Осылайша, желтоқсанның біріне дейін Некрасов көшесіндегі жөндеу жұмыстары толығымен аяқталады. Естеріңізге салайық, ертең таңғы сағат жетіден бастап Асау-Барақ көшесінде екі жақты қозғалыс жанданады. Бірақ, жүргізушілер ескеруі тиіс жайт, Асау-Барақ көшесімен қаланың ескі бөлігінен автовокзалды бет алған көліктерге Әкімжанов көшесі қиылысынан тек оңға бұрылуға рұқсат беріледі. Бұл бағыттағы көліктерге Әкімжанов көшесін кесіп өтуге тиым салынады.