"Нұр-Ғасыр" мешітінің алдындағы жерасты өткелі ашылды. Қалабасы Асхат Шахаров мердігер мекемелер жертөлені суға толтырып жатқан бұлақ көзін тауып, су жинайтын құдық орнатқанын мәлімдеді. Енді жерасты өткелімен тұрғындар алаңсыз жүре алады.
Әбілқайыр хан даңғылының бойында орналасқан қаладағы жалғыз жерасты өткелі 11 жыл бұрын салынған. Биыл жауын-шашынның көп болуына байланысты жерасты сулары көтеріліп, тізеден келетін су жиналған еді. Мердігер ұйымдар әр 5 сағат сайын суды сорғытып отырды. Алайда, су толастамай, қайта-қайта жинала берді. Тұрғындардың жүруіне мүмкіндік болмаған соң өткел уақытша жабылған болатын.