Нұр Ақтөбе ауданының тұрғындарын қаланың орталығына таситын жаңа маршрут енгізілді. №51 бағыттағы көлік Ақжар, Қарғалы, Кірпішті ауылдары арқылы 5-ші, 8-ші ықшам аудандарға барады. Әзірге 10-12 адамға арналған шағын сыйымдылықтағы 8 "Газель" мен екі "Хюндай" автобусы айналымға енгізілген. Бүгін "Нұр Ақтөбеден" шығып, оңға бұрылды. Ақжар-1, Ақжар-2 елді мекендерінен кейін Кірпішті ауылына соғып, Әкімжанов, Қонаев көшелері арқылы бесінші ықшам ауданға барады. Бұл "Нұр Ақтөбе" ауданында тұратын студенттер үшін де тиімді маршрут. Олар бұрын екі автобуспен жүрсе, бұл жолы Жұбанов университетіне жету үшін №51 маршрутты пайдалана алады. Бірақ, ұзақ жол жүруге тура келеді. Себебі, жаңа маршруттың 40 аялдамасы бар. №51 маршруттың бағытына "Жібек жолы" серіктестігі жауапты. Бұл мекеме халықаралық тасымалды қамтамасыз етеді. Сондықтан арнайы жөндеу орталығы бар, қызмет көрсетуге ыңғайлы мекеме. Шешім қабылдаған жергілікті әкімдік бір ай сынақ мерзімі ішінде жолаушылардың ағынын байқап, тұрғындардың сын-ескертулерін қабылдайды. Қалалық әкімдік таяуда №52 бағыттағы автобусты іске қосуды жоспарлап отыр. Бұл бағыттағы негізгі тасымалдаушы әлі анықталмады. Дегенмен сызбасы дайын. Жаңа маршрут наурыз айынан бастап Сүт зауыты ауданынан шығып, Әуе қалашығындағы емханаға соғады. Кейін "Юнис сити" тұрғын үй кешені арқылы Сәңкібай батыр даңғылының бойымен жүреді. "Дару" емханасы мен "Көл авто" кешені арқылы Пацаев пен Ағайынды Жұбановтар көшелеріне аялдайды.