Бүгін терроризмді насихаттады деген айып тағылған қала тұрғындарына үкім шықты. Өңірдегі құрылыс нысандарының бірінде күзетші болып жұмыс жасаған Қуанышбек Жайлаубаев пен Азамат Баймұрзин жұмыс орнында бірнеше қызметкерге терроризм жайлы ақпарат таратқан. Олар экстремистік топтардың мүддесін насихаттаған. Тергеу кезінде олардың сөздері жазылған бейнетаспа дәлел ретінде пайдаланылды. Бейбіт тұрғындардың санасын улаған сотталушыларға бүгін №2 қалалық сот үкім шығарды. Қауанышбек Жайлаубаев 8, Азамат Баймұрзин 7 жылға сотталды.
27 жастағы Қуаныш Жайлаубаев террорлық ақпарат таратқаны үшін 2014 жылы сотталған. 4 жыл жазасын өтеп шығып, қайтадан темір торға қамалды. Өткен іс-әрекетінен сабақ алмаған бұл азамат қатаң тәртіптегі түзету мекемесінде жазасын екінші рет өтейтін болды. Ал, Азамат Баймұрзин бұрын соңды құқық бұзу әрекеті тіркелмегені ескеріліп, 7 жыл жалпы тәртіптегі абақтыда жазасын өтейді. Сотталушылардың туғандары үкіммен келіспейтінін айтты.Сотталушылардың жазасын өтеу мерзімдері қамауға алынған күннен бастап есепке алынды. Сонымен қатар, олардан сот ісінің шығындары өндіріледі. Соттың үкімімен келіспеген жақ 15 күннің ішінде апелляциялық шағым түсіре алады.