Балалар қауіпсіздігі басты назарда! Әсіресе сулы аймақтарға кәмелетке толмағандарды қараусыз жіберуге тыйым салынады. Құтқарушылар бүгін ақтөбелік балғындарға суға шомылу ережелерін түсіндірді. Шара Кеңес Нокин даңғылында ашылған жаңа саяжайда өтті.Суға түсу маусымы басталмай жатып, өңірімізде үш бүлдіршін суға батып кетті. Оқиға 4-маусым күні Ырғыз өзенінде болған. 4 және 5 жастағы бүлдіршіндер су жағасына ересектердің қарауынсыз барған. Балаларды қараусыз қалдырмаңыз деп, қанша айтылғанымен, нәтиже жоқ, дейді құтқарушылар. Сондықтан профилактикалық шаралар күшейтілмек. Бүгін Нокин даңғылында жаңадан коммуналдық жағажай ашылды. Салтанатты шараға 100- ге жуық бала мен ата-аналар шақырылды. Оларға қауіпсіздік ережелері түсіндірілді.
Облыста 72 жағажай бар. Оның 51- і коммуналдық, қалғаны жеке. Ал суға түсуге тыйым салынған, әрі қауіпті деп белгіленген 220 орын тіркеулі. Құтқарушылардың ескертуіне құлақ аспай, бұл жерлерге де жиналушылар көп. Сондықтан жаз бойы жағажайлар мен су жағаларын атты әскерлер торуылдайды. Рейдтік шаралар апта сайын жалғаспақ. Ереже бұзғандар әкімшілік жазаға тартылып, айыппұл төлейді.
Биыл қала бойынша 18 жағажай жұмыс істейді. Ал Нокин даңғылында жаңадан ашылған коммуналдық жағажайға кіру тегін. Мұнда құтқарушы бар. Күннен қорғайтын шатырлар қойылып, киім ауыстыратын орын да қарастырылған. Жаңа жағажайға таза құм төгілді. Қоғамдық орын жергілікті кәсіпкердің демеушілігімен ашылып отыр.