Бүгін қала әкімі Ілияс Испанов халық алдында есеп берді. Былтыр атқарылған жұмыстарды қорытындылады. Есепті тұрғындармен бірге облыс әкімі Бердібек Сапарбаев та тыңдады. Халық қос әкімді сұрақтың астына алды. Баспана, жол ақысы, қоғамдық көлік, тіпті, мектептерді жайлаған жемқорлық мәселесі де айтылмай қалмады. Ақтөбеде 22 мың адам пәтер кезегінде тұр. Көп балалы аналардың мәселесін қарау үшін арнайы комиссия құрылады. Комиссия мүшелері олардың өмір сүру жағдайларына қарай бірнеше топқа бөліп, зерттеу жасамақ. Келесі аптаның алғашқы үш күнінде комиссия көп балалы аналарды қабылдайды. Ол жерде пәтер кезегі, жәрдемақы мәселесі де қараусыз қалмайды. Тұрғындар Халыққа қызмет көрсету орталықтарынан да олқылықтар тапқан. Қара халықтан қарапайым қызметтер үшін ақша алып отырған басшылар да бар деп, шындықты айтып, шырылдаған адамдардың қолынан микрофонды жұлып алмаққа ұмтылғандар да болды. Кездесуде айтылған мәселе көп. Билік өкілдері барлығын тыңдап, қарастыруға уәде берді.