Бүгін "Алақай" қуыршақ театрында IV облыстық "Ерке театр Ақтөбе" балалар фестивалі басталды. Фестивальға қала және Қобда, Алға аудандарынан 300-ге жуық мектеп оқушысы мен мектепке дейінгі ұйымдардың тәрбиеленушілері қатысып жатыр. Барлығы 28 ұжым үш күн бойы түрлі ертегілік қойылымдарын сахналайтын болады. "Алақай" қуыршақ театрында жыл сайын ұйымдастырылатын шараның мақсаты жас жеткіншектердің театр өнеріне деген қызығушылығын, балалардың шығармашылық деңгейін арттыру, театр мен өңірдің білім беру ұйымдары арасында шығармашылық байланыс орнату. Театр сахнасында басқа қырынан танылатын балақайлар жыл сайын аталмыш фестивальға зор ықыласпен қатысады, дейді ұйымдастырушылар.
IV облыстық "Ерке театр Ақтөбе" фестиваліне қаладағы 19 балабақшаның шығармашылық топтары, сондай-ақ, Алға қаласынан №2 мектепке дейінгі ұйымының тәрбиеленушілері, Қобда ауданынан Талдысай орта мектебі мен И.Тайманов атындағы гимназияның оқушылары - барлығы 300-ге тарта бала қатысады. Үш күн бойы шығармашылық топтар қазақ және орыс тілдерінде ертегілік қойылымдарын сахналайды.
31-наурыз фестивальдің соңғы күнінде қазылар алқасы қатысушыларды 4-6, 7-8 және 9-10 жас санаттары бойынша бағалап, арасынан "Ең үздік актер", "Ең үздік актриса", "Ең үздік сценография", "Ең үздік көркемдік жетекші" сынды номинацияларға лайықтыларды анықтайды. Сондай-ақ, фестиваль қатысушыларының бәріне бірдей дипломдар мен естелік сыйлықтар табысталады.