Әбілқайыр хан даңғылындағы әкімшілік ғимараттың шатыры опырылып, қиранды астында қалған 33 жастағы мекеме қызметкері бүгін жансақтау бөлімінде көз жұмды. Қабырғалары сынып, миы шайқалған әйел кеше ауыр хәлде ауруханаға жеткізілген болатын. Қалалық төтенше жағдайлар басқармасының алдын ала мәліметінше, ғимараттың ішінара құлауына онда жүргізілген жөндеу жұмыстары себеп. Қиранды астыннан 5 адам шығарылды. Үйінді астында қалғандардың бірі Ләззат Мырзагелдинаның бірнеше қабырғасы сынып, миы шайқалған. Кеше кешкі сағат сегіздерде ол ауыр хәлде ауруханаға жеткізіліп, бірден жансақтау бөліміне салынған. Дәрігерлер қолдан келгендерін жасаса да, ажалдан арашалап қала алмады. Айта кету керек, марқұм облыстық "Ауыл шаруашылығын қаржылай қолдау қоры" АҚ филиалының мониторинг бөлімінің маманы болған.
Ішінара қираған ғимарат қоршауға алынған. Ішіне ешкімнің кіруіне рұқсат жоқ. Себебі қалған бөлігі де кез келген сәтте опырылуы мүмкін. Қалалық төтенше жағдайлар басқармасы басшылығының алдын ала дерегінше, бірнеше мекеменің офистері орналасқан ғимаратта жөндеу жұмыстары жүргізілген. Ал шатырға ауыр құрылыс материалдары шығарылып, төбе салмақты көтере алмай құлаған болуы мүмкін. Апат нысанды жалға алған бірнеше ірі ұйымның жұмысына да кедергі келтірді. Ғимаратта "Даму" қорынан бөлек, "ҚазАгроҚаржы" АҚ филиалы, "Алға КТ" ЖШС, сондай-ақ жеке нотариус және бағалау компаниясы офистері болған. Төтенше оқиға кеше кешкі жеті жарымдар шамасында болды. Облыстық ПД баспасөз қызметінің жетекшісі Ерболат Сарқұлов ҚР ҚК "Еңбекті қорғау қағидаларын бұзу" бабының "абайсызда денсаулыққа ауыр зиян келтіру" бөлімімен іс қозғалғанын жеткізді. Айта кету керек, ғимараттың жалпы аумағы 1800 шаршы метр. Оның 200 шаршы метр аумағы қирады. Құтқарылған 4 қызметкердің жағдайы жақсы.