Газ құбырын жүргізген мердігер компанияның салғырттығынан бір отбасы ауыз сусыз қалды. Он күннен астам уақыт бойы отбасы мүшелері талай жауапты мекеменің есігін қағып үлгеріпті.Шиіттей бала-шағасы бар Татьяна Орлова он күннен бері көршілерден су тасып ішіп отырғандарын айтады. Бала-шағаның кір- қоңын жуудан қалдық. Газ тартамыз деп келген техника су құбырын үзіп кетті. Енді оны жөндеп берудің орнына бірнеше күн өзімізді әбігерге салып қойды, дейді көп балалы ана.
Кутузов көшесіндегі №33- үйдің артында газ құбырын жаңартпақ болған "Азия Қаз ТрансГаз Аймақ" АҚ бұл жұмыстарды мердігер компания "Азия Газ Монтаж" ЖШС- не тапсырыпты. Арнайы техника тереңдігі 1 метр шұңқыр қазып тастаған. Сол кезде жердің астымен жеке үйге су жеткізіп тұрған құбырға зақым келген.
Астана ауданының әкімі Мамырғали Аққағазов мердігер компания өз міндетін орындамаған жағдайда шара қолданылатынын айтты. Осы материал эфирге әзірленіп жатқанда, мердігер компания редакциямен байланысып, жаңа ғана құбыр жөнделгенін хабарлады. Қызмет ұсынушы компания өкілдері құбырды тексеріп, тұрғын үйге су беретін болды.