Бүгін өңірлік коммуникациялар қызметі алаңында қалалық төтенше жағдайлар басқармасы мен "ҚазТрансГазАймақ" мекемесінің басшылары бірлесіп, брифинг өткізді. Қала тұрғындарына газ баллондары мен газ құрылғыларын пайдалану кезінде қауіпсіздік шараларын мұқият сақтау қажеттігі ескертілді. Өрт пен жарылыстардың алдын алу шарттары тағы бір мәрте түсіндірілді. Осыдан үш күн бұрын Ақмола облысында газ баллоны жарылып үш адам ажал құшты, тағы 10 адам ауруханаға түсті. Осы оқиғадан кейін өңірлерде тұрғындарға ескерту жасалуда.
Биыл ақпанда Мұғалжар ауылында газ баллон жарылып, 11 жастағы бала көз жұмған болатын. Өрт сөндірушілер оқушының денесін үйінді астынан алып шықты. Үй иелері үйге кіргізіп қойған газ баллоны жарылып, арты өртке ұласты. Жалпы биыл қалада 300-ге жуық өрт оқиғасы тіркелді. ТЖБ қызметкерлері биыл 7600 тұрғын үйді аралап, халық арасында түсіндіру жұмыстарын жүргізді. Газге тамақ жасау кезінде асты қараусыз қалдырғаны үшін 47 адамға әкімшілік шара қолданылды. Сондай-ақ мамандар қазір мұз үстіне шығу қауіпті екенін ескертеді. Әсіресе жергілікті балықшыларға аязды күтуге шақырады.