Ескі қаладағы қоқыс контейнерлері тазартылмайды. Тұрғындар қоқыс мәселесімен соңғы үш жылдан бері күресіп келе жатқанын айтады. Әкімдікке бірнеше рет арызданғанымен нәтиже жоқ. Ал, тасып- төгілген тұрмыстық қалдықтар желмен ұшып аулаларды ластауда.
Мына қоқыс контейнерлері Әйтеке би көшесі №24 үйдің ауласында орналасқан. Тасып- төгіліп жатқан тұрмыстық қалдықтардың жанында балалар ойнайтын алаң тұр. Аула тұрғындары қоқыс мәселесін көтеріп, бірнеше рет шаһар әкіміне арызданған. Алайда, мәселенің сол күйі шешілмей келе жатқанына міне 3 жыл болған.
Алматы аудандық әкімдігінде ескі қаладағы қоқысты шығаруға "Ақжол LTD" ЖШС жауапты екенін айтады. Әкімдік өкілі де мердігер компанияның техникасы істен шыққанын растап отыр. Жалпы Алматы ауданында қоқыс шығарумен үш мердігер компания айналысады. "Clean City" ЖШС "Нұр Ақтөбе" ауданындағы, 41-бекет пен Сүт зауыты аудандарындағы қоқыс контейнерлерін тазалайды. "Ақжол LTD" ЖШС ескі қаладағы, Кірпішті елді мекеніндегі және Құрмыш ауданындағы тұрмыстық қалдықтарды шығарады. Ал, Қарғалы тұрғын алабы, Заречный-1,2,3,4 елді мекендері, Ақжар-1, Ақжар-2, Рауан, Кеңес Нокин, Қызылжар, Ақшат, Бекқұл Баба, Пригородный елді мекендерінің тазалығына "Таза Қарғалы" ЖШС жауап береді.