Бүгін "Есет батыр" тұрғын алабының 4-мөлтек ауданында 900 орындық мектеп ашылды. Енді мұнда екі кезеңге бөлініп, 1800 бала білім алатын болады. Жаңа мектептің ашылуы аудан халқы үшін өте маңызды. Өйткені, тұрғындар саны 44 мыңнан асатын "Есет батыр" тұрғын алабында әлі де мектеп пен балабақша мәселесі шешілген жоқ. "Есет батыр" тұрғын алабында қазір 44 мыңнан астам халық бар. Алдағы уақытта тұрғындар саны 200 мыңға жетеді деп жоспарланып отыр. Ауданда үй құрылысы қарқын алған. Әйтсе де мұнда мектеп пен мемлекеттік балабақша тапшы. Көп балалы отбасылардың дені де осы ауданға тұрақтаған. 900 орындық мектептің құрылысы толығымен аяқталған жоқ. Спорт алаңы, асханасы әзір дайын емес. Соған қарамастан білім беру ұйымы балаларды бүгіннен бастап қабылдады. 58 оқу кабинеті керекті оқу құралдарымен жабдықталған, мұғалімдері де түгел. 8 зертханасы жұмыс істейді, интерактивті тақталар әр сыныпта ілулі. Мектептің құрылысына облыстық бюджеттен 1 млрд.540 млн теңге бөлінген. Жалпы аумағы 12 096 шаршы метр. Алдағы уақытта ауласын асфальттап, көгалдандыру көзделіп отыр. Бүгін білім ордасын облыс басшысы Ералы Тоғжанов аралады. Су жаңа мектепке келіп, алғаш рет партаға отырған бүлдіршіндерге сәттілік тіледі.
Ақтөбеде үш ауысымды мектеп мәселесі өзекті. Атап айтсақ, №60 , №12, 64 №73- ші мектептер балаға лық толы. Ал апатты жағдайдағы Қызылжар орта мектебі биыл жабылды. Енді Қызылжар ауылының оқушылары осында келіп оқиды. Балаларды тасымалдауға арнайы автобус бар. №60- мектептің мәселесі әлі шешілген жоқ. Мұнда жапсарлас құрылыс салуға бюджеттен қаржы бөлінуін күтіп отыр. "Есет батыр" тұрғындар алабына әлі де білім беру мекемелері керек. Жоба бойынша мұндағы №3 мөлтек ауданға мектеп салынуы тиіс. Тұрғындар бұдан бөлек балабақша, спорт алаңдары мен шығармашылық үйлерін сұрап отыр. Балаларды дамытатын мектептен тыс орталықтары жоқ. Жолдары да тегістелмеген. Полиция басқармасы жол қозғалысы белгілерін орнатса, балаларымызды мектепке алаңсыз жіберер едік дейді. Сондай-ақ, бұралқы иттерден қауіп зор. Айта кетейік, "Есет батыр" тұрғындар алабы, №4-ші мөлтек ауданында ашылған мектепке бүгіннен бастап Қызылжар ауылы мен 3-ші мөлтек ауданынан оқушылар қатынап оқиды. Білім ордасы әлі де ата-аналардан өтініш қабылдап жатыр. Мектеп 1800 балаға шақталған.