Балалы үй - базар. Қазір бұл - жас отбасылардың басты ұстанымына  айналып отыр. Мұны облыстағы былтырғы  «бэби-бумнан» анық  аңғаруға болады. Облыстың бас акушер-гинекологы Әлия  Шаңғараеваның айтуынша, өткен жылы өңірде 18963 шарана өмірге  келген. Оның жүзі егіздер болса, бір ана дүниеге үшем алып келді. Ал  бүгінде 9 мың жүкті келіншек тіркеуде тұр.  Жаңа жылдан бастап елде  зейнетақы 9 пайызға артса, әлеуметтік жәрдемақы 7 пайызға көтерілді.  «2014-2016 жылдарға арналған республикалық бюджет туралы»  Қазақстан Республикасының Заңына сәйкес, жаңа жылдан бастап АЕК  мөлшерінің көбеюіне байланысты 2014 жылғы 1-қаңтардан бала  күтіміне берілетін ай сайынғы жәрдемақылардың мөлшері де өсті. 

Бала туылғанда берілетін біржолғы жәрдемақы мөлшері төртінші балаға  дейін 55560 теңге, төртінші баладан жоғары 92600 теңге, сондай-ақ  бала бір жасқа толғанға дейін оның күтіміне ай сайын төленетін  жәрдемақы мөлшері бірінші балаға - 10186 теңге, екінші балаға - 12038  теңге,үшінші балаға - 13890 теңге және төртінші балаға -15742 теңгені  құрайтын болады.