Биыл облыс жолдарын жөндеуге 32 млрд теңгеден астам қаражат бөлінді. Аталмыш сомаға 201 жобаны жүзеге асыру көзделген. Бүгін өңірлік коммуникациялар қызметінде өткен брифингте облыстық жолаушылар көлігі және автомобиль жолдары басқармасы басшысының орынбасары Рүстем Төреғалиев жергілікті жол инфрақұрылымын дамыту жөнінде ақпаратпен бөлісті. Биыл жергілікті маңыздағы тас жолдар және көше жолдарында құрылыс-монтаждау жұмыстарын жүргізу үшін республикалық бюджеттен 14,5 млрд теңге, облыстық қазынадан 17 млрд теңге және аудан қаражатынан 0,8 млрд теңге бөлініп отыр. Бөлінген қаражат есебінен 752,7 шақырым автомобиль жолдары жөнделеді. Оның ішінде 144,5 шақырымы көше жолдары. Жоспарға сәйкес, облыс орталығында биыл "Нұр-Ақтөбе", "Батыс-2" аудандарында, "Рауан" тұрғын массивінде, "Заречный-3" ауданында бірқатар жолдар салынады. Сондай-ақ, М.Жұмабаев, Локомотивная, Мәскеу, С.Разин, Чехов көшелерінде жолдар жөнделеді. 312- атқыштар дивизиясы даңғылы, Сейітов, Жайық, Ағайынды Жұбановтар, Әз-Наурыз көшелерінде және тұрғындар арасында "кіші Әлия" аталып кеткен жол учаскесінде орташа жөндеу жұмыстары жүргізіледі.
Басқарма өкілі, сондай-ақ, өткен жылы атқарылған жұмыстардың қортындысымен бөлісті. Айтуынша, былтыр облыс жолдарын жөндеуге 23,5 млрд теңге жұмсалды. Бөлінген қаражат есебінен 379 шақырым автомобиль жолдары жөнделді. Өңірде жыл сайын жол жөндеу жұмыстарына қыруар қаржы жұмсалады. Алайда, салынған жолдардың сапасы сын көтермейді. Ақтөбелік көлік жүргізушілері асфальттың жыл сайын қармен бірге еритінін айтып, наразылықтарын білдірді. Жол жөндеу жұмыстарының сапасын "Жол активтерінің ұлттық сапа орталығы" облыстық филиалы қадағалайды. Аталмыш мекеме биыл да жөнделетін жолдардың сапасын бақылау үшін ұсыным хаттар алған. Қазіргі таңда 14 мемлекеттік мекемеден 119 жобаға қатысты ұсыным хат келіп түскен. Оларға көрсетілетін қызмет түрлеріне жалпы құны 389,3 млн теңге көлемінде бағалық ұсыным жолданды.