Байғанин ауданының әкімі Қайрат Отаровтың ісі мемлекеттік қызметте жұмыс істеуге сәйкес келмейді. Бүгін Әдеп кеңесінің төрағасы Әділбек Мұқашев осындай шешім қабылдады.
Қайрат Отаров бұрынғы қызметінде, яғни облыстық жұмыспен қамтуды үйлестіру және әлеуметтік бағдарламалар басқармасы басшысы кезінде шетелдік жұмыс күштерін тартуға заңсыз рұқсат берген. Онымен қоса басқарманың бөлім басшысы Роза Әленованың да әрекеті талқыға түсті. Қайрат Отаров жұмыс барысында жіберген кемшіліктерін жоққа шығармады. Дегенмен, тиісті органдардан хабарламалардың кеш келгенін, тіпті кейбірін көрмей қалғандарын айтып ақталды. Байғанин ауданының әкіміне комиссия мүшелерінің үшеуі ғана қолдау білдірді. Нәтижесінде Әдеп кеңесінің төрағасы Әділбек Мұқашев Қайрат Отаров мемлекеттік қызметте жұмыс істеуге сәйкес келмейді деген шешім шығарды.